மெக்சிகோவின் போராட்டத்தை முறியடித்து காலிறுதியில் இங்கிலாந்து

உலகக் கிண்ண கால்பந்தாட்டத் தொடரின் பரபரப்பான இறுதி 16 அணிகளுக்கான சுற்றில், தொடரை நடத்தும் இணை நாடான மெக்சிகோவை 3-2 என்ற கோல் கணக்கில் வீழ்த்தி இங்கிலாந்து அணி காலிறுதிக்கு தகுதி பெற்றுள்ளது. மோசமான வானிலை காரணமாக இந்த போட்டி திட்டமிட்ட நேரத்தை விட ஒரு மணி நேரம் தாமதமாகவே தொடங்க…

மோசமான வானிலை காரணமாக இந்த போட்டி திட்டமிட்ட நேரத்தை விட ஒரு மணி நேரம் தாமதமாகவே தொடங்கியது குறிப்பிடத்தக்கது.

போட்டியின் முக்கிய நிகழ்வுகள்

பெல்லிங்ஹாமின் மின்னல் வேக கோல்கள்: போட்டியின் தொடக்கத்திலேயே இங்கிலாந்தின் நட்சத்திர இளம் வீரர் ஜூட் பெல்லிங்ஹாம் அதிரடி காட்டினார். புகாயோ சாகா வழங்கிய அருமையான பந்துப் பரிமாற்றத்தை முதலில் கோலாக மாற்றிய பெல்லிங்ஹாம், அடுத்த ஒரே நிமிடத்துக்குள் ஹரி கேன் வழங்கிய பந்தைப் பெற்று மற்றொரு கோலையும் அடித்து மெக்சிகோ ரசிகர்களை அதிர வைத்தார். மெக்சிகோவின் பதிலடி: இரண்டு கோல்கள் பின்தங்கிய நிலையிலும் மனம் தளராத மெக்சிகோ அணி முதல் பாதியின் இறுதிப் பகுதியில் மீண்டு வந்தது. பெனால்டி பகுதிக்குள் தளர்வாக வந்த பந்தை லாவகமாகப் பிடித்து ஜூலியன் குய்னோன்ஸ் ஒரு அபாரமான கோல் அடித்து அணியின் நம்பிக்கையை உயிர்ப்பித்தார். சிவப்பு அட்டை மற்றும் பெனால்டி திருப்புமுனைகள்: இரண்டாம் பாதியில் இங்கிலாந்து பின்களவீரர் ஜரெல் குவான்சா கடுமையான விதிமுறை மீறல் காரணமாக காணொளி உதவி மத்தியஸ்தர் ஆய்வுக்குப் பின் சிவப்பு அட்டை பெற்று வெளியேற்றப்பட்டார். இதனால் இங்கிலாந்து 10 வீரர்களுடன் விளையாட வேண்டிய கட்டாயத்திற்கு தள்ளப்பட்டது. எனினும், அந்த அழுத்த நிலையிலும் அந்தனி கோர்டனை மெக்சிகோ கோல் காப்பாளர் விதிமுறைகளை மீறி கையாண்டதால் கிடைத்த பெனால்டி வாய்ப்பை கேன் கோலாக மாற்றி 3-1 என முன்னிலை தந்தார். கிமென்ஸின் பெனால்டி கோல்: போட்டியின் இறுதிப் பகுதியில் மெக்சிகோவின் பிரையன் குட்டரெஸை கேன் விதிமுறைகளை மீறி கையாண்டதாக காணொளி உதவி மத்தியஸ்தர் உறுதி செய்ததை அடுத்து, மெக்சிகோவுக்கு பெனால்டி கிடைத்தது. அதை றாவுல் கிமென்ஸ்ஸ் கோலாக மாற்றியதால் போட்டி 3-2 என உச்சகட்ட பரபரப்பை எட்டியது. ஆனாலும் இங்கிலாந்து வீரர்கள் மேற்கொண்டு கோல் விழாமல் தடுத்து வெற்றியை உறுதி செய்தனர்.

அடுத்த சவால்: இங்கிலாந்து எதிர் நோர்வே

10 வீரர்களுடன் போராடி அசாத்திய வெற்றி பெற்றுள்ள இங்கிலாந்து அணி, விறுவிறுப்பான காலிறுதிப் போட்டியில் நோர்வே அணியை எதிர்கொள்ளவுள்ளது.