பௌர்ணமி ’ஏரி மீன்’ கனவு கலைந்தது

பொசன் பௌர்ணமி தினத்தில் 'ஏரி மீன்' கலந்த விருந்தை எதிர்பார்த்து, நீண்ட தூரம் பயணம் செய்த உறவினர்கள் குழுவொன்றுக்கு இறுதியில் ஏமாற்றமே மிஞ்சிய சம்பவம் ஒன்று பதிவாகியுள்ளது. தென்பகுதியைச் சேர்ந்த உறவினர்கள் குழுவினர், பொசன் பௌர்ணமிக்கு முன்தினம் ரஜரட்டை எல்லைக்கு அருகிலுள்ள கஹல்ல…

பொசன் பௌர்ணமி தினத்தில் 'ஏரி மீன்' கலந்த விருந்தை எதிர்பார்த்து, நீண்ட தூரம் பயணம் செய்த உறவினர்கள் குழுவொன்றுக்கு இறுதியில் ஏமாற்றமே மிஞ்சிய சம்பவம் ஒன்று பதிவாகியுள்ளது.

தென்பகுதியைச் சேர்ந்த உறவினர்கள் குழுவினர், பொசன் பௌர்ணமிக்கு முன்தினம் ரஜரட்டை எல்லைக்கு அருகிலுள்ள கஹல்ல பல்லேகெலே வனப்பகுதிக்கு அருகில் வசிக்கும் தங்கள் உறவினர்களைச் சந்திக்க வந்தனர். இந்த உறவினர்களுக்கு அந்தப் பகுதியில் கிடைக்கும் சுவையான 'ஏரி மீன்' உணவுகள் மிகவும் பிடிக்கும். கடந்த காலங்களில் அங்கு வந்தபோது, களா பலுவெவ மற்றும் சியம்பலங்கமுவ ஏரிகளிலிருந்து பிடிக்கப்படும் மீன்களைக் கொண்டு, அவர்கள் வயிறார உண்டு மகிழ்ந்ததோடு, வீட்டிற்கும் எடுத்துச் சென்றதுண்டு.

வழக்கம் போல் இம்முறையும் மீன் உணவை எதிர்பார்த்து வந்தவர்களுக்கு, பௌர்ணமி தினம் என்பதால் மீன் கிடைப்பது குதிரைக் கொம்பாக இருந்தது. பெரும் ஏமாற்றத்துடன் இருந்த அவர்களிடம், பொல்பிதிகம நகரப் பகுதியில் 'ஏரி மீன் மற்றும் சோறு' வழங்கும் தானசாலை (Dansala) இருப்பதாக யாரோ தவறான தகவல் தெரிவித்துள்ளனர். மீன் மீதான தீராத ஆசையினால், பௌர்ணமி வழிபாடுகளைக்கூடத் தள்ளி வைத்துவிட்டு, அந்த உறவினர்கள் மூன்று வேன்களில் பொல்பிதிகம நோக்கிப் படையெடுத்தனர்.

பொல்பிதிகம சென்றடைந்த அவர்களுக்கு அங்கே பல தானசாலைகள் இருந்தன; ஆனால், அவர்கள் தேடிச் சென்ற அந்த 'மீன் சோற்றுத் தானசாலை' இல்லை. அங்கிருந்த ஒரு ஹோட்டலில் 'ஏரி மீன் சோறு' என்ற பெயர் பலகையைக் கண்ட அவர்கள், பௌர்ணமி என்பதால் அதுவும் மூடப்பட்டிருப்பதைக் கண்டு நிலைகுலைந்து போயினர். இறுதியில், வேறு ஏதோ ஒரு தானசாலையில் வெறும் உணவை உண்டுவிட்டு, 50 கிலோமீட்டருக்கும் அதிகமான தூரம் பயணித்த அந்த உறவினர்கள், தாங்கள் செல்லத் திட்டமிட்டிருந்த புனிதத் தலங்களை வழிபட முடியாமல் ஏமாற்றத்துடன் திரும்பியதாகத் தெரியவந்தது.