டி.கே.பி கபில ஒரு கோடியே எட்டு லட்சம் ரூபாய் (10.8 மில்லியன்) பெறுமதியான, வெளிநாட்டில் தயாரிக்கப்பட்ட சிகரெட்டுகளைச் சட்டவிரோதமாக நாட்டுக்குள் கடத்தி வந்த நான்கு வெளிநாட்டுப் பயணிகள், கட்டுநாயக்க விமான நிலைய சுங்க அதிகாரிகள் மற்றும் சுங்க போதைப்பொருள் கட்டுப்பாட்டுப் பிரிவினரால்…
டி.கே.பி கபில
ஒரு கோடியே எட்டு லட்சம் ரூபாய் (10.8 மில்லியன்) பெறுமதியான, வெளிநாட்டில் தயாரிக்கப்பட்ட சிகரெட்டுகளைச் சட்டவிரோதமாக நாட்டுக்குள் கடத்தி வந்த நான்கு வெளிநாட்டுப் பயணிகள், கட்டுநாயக்க விமான நிலைய சுங்க அதிகாரிகள் மற்றும் சுங்க போதைப்பொருள் கட்டுப்பாட்டுப் பிரிவினரால் கைது செய்யப்பட்டுள்ளனர்.
கைது செய்யப்பட்டவர்கள் 35 வயது மதிக்கத்தக்க நான்கு சீன நாட்டு வர்த்தகர்கள் ஆவர். இவர்கள் ஜூலை 07 அதிகாலை 12:30 மணியளவில், தாய்லாந்தின் பாங்காக் நகரிலிருந்து 'தாய் ஏர்வேஸ்' (Thai Airways) நிறுவனத்திற்குச் சொந்தமான 'TG-307' என்ற விமானம் மூலம் கட்டுநாயக்க விமான நிலையத்தை வந்தடைந்தனர்.
விமான நிலையத்தின் வருகை முனையத்தில், பிரகடனப்படுத்துவதற்கு எதுவுமில்லை என்ற 'பசுமை வழி' (Green Channel) ஊடாகச் சந்தேகத்திற்கு இடமின்றி வெளியேற அவர்கள் முயற்சித்துள்ளனர். இச்சமயத்தில், சோதனையில் ஈடுபட்ட அதிகாரிகள் இவர்களை மடக்கிப் பிடித்தனர்.
அவர்கள் கொண்டு வந்த ஆறு பயணப் பொதிகளுக்குள் (Bags), சீனாவில் தயாரிக்கப்பட்ட 72,000 சிகரெட்டுகள் (360 கார்ட்டூன்கள்) மறைத்து வைக்கப்பட்டிருந்தது சோதனையில் கண்டறியப்பட்டது.
கைது செய்யப்பட்ட குறித்த நால்வரையும் கட்டுநாயக்க விமான நிலைய சுங்க அதிகாரிகள் தங்கள் கட்டுப்பாட்டில் வைத்துள்ளனர். இச்சம்பவம் குறித்து மேலதிக விசாரணைகள் தற்சமயம் நடைபெற்று வருகின்றன.