நான்கு பேரைப் படுகொலை செய்ததாகக் குற்றம் சுமத்தப்பட்டிருந்த சந்தேகநபர் ஒருவரை, வடமத்திய மாகாண மேல் நீதிமன்ற நீதிபதி இந்திக அத்தநாயக்க வழக்கிலிருந்து விடுவித்து தீர்ப்பளித்துள்ளார். கடந்த 16 ஆண்டுகளாக இழுபறியில் இருந்த இந்த வழக்கு, தற்போது முடிவுக்கு வந்துள்ளது. கடந்த 2010 ஆம் ஆண…
நான்கு பேரைப் படுகொலை செய்ததாகக் குற்றம் சுமத்தப்பட்டிருந்த சந்தேகநபர் ஒருவரை, வடமத்திய மாகாண மேல் நீதிமன்ற நீதிபதி இந்திக அத்தநாயக்க வழக்கிலிருந்து விடுவித்து தீர்ப்பளித்துள்ளார். கடந்த 16 ஆண்டுகளாக இழுபறியில் இருந்த இந்த வழக்கு, தற்போது முடிவுக்கு வந்துள்ளது.
கடந்த 2010 ஆம் ஆண்டு பிப்ரவரி 02 ஆம் திகதி, குடும்பத் தகராறு காரணமாகத் தனது மனைவி, மனைவியின் தாய், மனைவியின் தாயின் சகோதரி மற்றும் அந்தப் பெண்ணின் காதலர் ஆகிய நால்வரையும், ஒரே கட்டிலில் உறங்கிக் கொண்டிருந்தபோது இரும்புத் தடியால் அடித்துக் கொலை செய்ததாகச் சந்தேகநபர் மீது குற்றம் சுமத்தப்பட்டிருந்தது.
அனுராதபுரம், கல்குளம பகுதியைச் சேர்ந்த எம்.நளீன் சஞ்சீவ என்ற முன்னாள் இராணுவ சிப்பாய் மீதே இக்குற்றச்சாட்டு முன்வைக்கப்பட்டிருந்தது. படுகொலை செய்யப்பட்டவர்கள் சகிலா ஹன்சமாலி (சந்தேகநபரின் மனைவி), ரி.பி. அனுலாவதி, ரி.பி. பத்மினி மற்றும் எம்.கே. சம்பத் அனுரசிறி ஆகியோர் ஆவர்.
அனுராதபுரம் நீதவான் நீதிமன்றத்தில் ஆரம்பகட்ட விசாரணைகள் நிறைவடைந்ததைத் தொடர்ந்து, வழக்கு மேல் நீதிமன்றத்திற்கு மாற்றப்பட்டது. நீண்டகால விசாரணைக்குப் பிறகு தீர்ப்பை வழங்கிய நீதிபதி, “சந்தேகநபருக்கு எதிரான குற்றச்சாட்டுகளை, அரசுத் தரப்பு சந்தேகத்திற்கு இடமின்றி நிரூபிப்பதில் தவறிவிட்டது” என்று குறிப்பிட்டு, அவரை விடுதலை செய்தார்.
இந்த வழக்கில் அரசுத் தரப்பு சார்பில் அரச சட்டத்தரணி யோமாலி நாகொடவிதாரண ஆஜராகியதுடன், சந்தேகநபர் சார்பில் சட்டத்தரணி பாக்ய ஸ்ரீ ஹேரத் வாதாடினார். அனுராதபுரம் பொலிஸார் இவ்வழக்கிற்கான விசாரணைகளை மேற்கொண்டிருந்தனர்.