எகிப்தை வீழ்த்தி ஆர்ஜென்டீனா மிரட்டல் மீள்வருகை வெற்றி

உலகக் கிண்ண இறுதி 16 அணிகளுக்கான சுற்றுப் போட்டியில், நடப்புச் சம்பியனான ஆர்ஜென்டீனா அணி 2 கோல்கள் பின்தங்கிய நிலையிலிருந்து மீண்டு வந்து எகிப்தை 3-2 என்ற கோல் கணக்கில் வீழ்த்தி த்ரில் வெற்றி பெற்றது. போட்டியின் 15ஆவது நிமிடத்தில் எகிப்தின் யாசீர் இப்ராஹிம் தலையால் முட்டி முதல்…

உலகக் கிண்ண இறுதி 16 அணிகளுக்கான சுற்றுப் போட்டியில், நடப்புச் சம்பியனான ஆர்ஜென்டீனா அணி 2 கோல்கள் பின்தங்கிய நிலையிலிருந்து மீண்டு வந்து எகிப்தை 3-2 என்ற கோல் கணக்கில் வீழ்த்தி த்ரில் வெற்றி பெற்றது.

போட்டியின் 15ஆவது நிமிடத்தில் எகிப்தின் யாசீர் இப்ராஹிம் தலையால் முட்டி முதல் கோல் அடித்தார். 19ஆவது நிமிடத்தில் ஆர்ஜென்டினாவுக்கு கிடைத்த பெனால்டி வாய்ப்பை லியனல் மெஸ்ஸி தவறவிட்டார். இதன் மூலம் உலகக் கிண்ண வரலாற்றில் இரண்டு பெனால்டிகளை தவறவிட்ட முதல் வீரர் என்ற தேவையற்ற சாதனையை அவர் பெற்றார். எகிப்து கோல் காப்பாளர் மொஸ்தபா ஷொபீர் ஆர்ஜென்டினாவின் பல கோல் முயற்சிகளை அசாத்தியமாக தடுத்து நிறுத்தினார்.

இரண்டாம் பாதியில் (67ஆவது நிமிடத்தில்) மொஹமட் சாலா கொடுத்த பந்தைப் பயன்படுத்தி மொஸ்தபா ஸிக்கோ எகிப்தின் இரண்டாவது கோலை அடித்தார். 2-0 என எகிப்து வரலாற்று வெற்றியை நோக்கி நகர்ந்தபோது, மெஸ்ஸி போட்டியின் போக்கையே மாற்றினார்.

கடைசி நிமிடங்களின் அதிரடி திருப்பம்:

79ஆவது நிமிடம்: மெஸ்ஸி கொடுத்த துல்லியமான பந்தை கிறிஸ்டியன் றொமேரோ தலையால் முட்டி கோலாக்கினார் (2-1).

83ஆவது நிமிடம்: லொட்டரோ மார்டினெஸ் மற்றும் கொன்ஸலோ மொன்டியல் பந்தைக் கடத்த, மெஸ்ஸி மின்னல் வேகத்தில் கோல் அடித்து போட்டியை சமன் செய்தார் (2-2). இதன் மூலம் உலகக்கோப்பையில் அவரது மொத்த கோல்களின் எண்ணிக்கை 21 ஆக உயர்ந்தது.

கூடுதல் நேரம் (90+2'): ஒரு பதில் தாக்குதல் வியூகம் மூலம் மார்டினெஸ் கொடுத்த பாஸை, என்ஸோ பெர்னாண்டஸ் தலையால் முட்டி கோலாக்கி ஆர்ஜென்டினாவின் அசாத்திய வெற்றியை உறுதி செய்தார் (3-2).

கடைசி கட்டத்தில் நிலைகுலைந்த எகிப்து அணி பெரும் ஏமாற்றத்துடன் வெளியேறியது. தப்பிப்பிழைத்த ஆர்ஜென்டினா அணி காலிறுதிக்கு தகுதி பெற்று அசத்தியுள்ளது.