எரிபொருள் விலையில் மாற்றமில்லை: மானியத்துக்கு பரிசீலனை

வளைகுடா பிராந்தியத்தில் ஏற்பட்டுள்ள புதிய மோதல்கள் காரணமாக உலக சந்தையில் கச்சா எண்ணெய் விலை தொடர்ந்து அதிகரித்து வரும் நிலையில், பெட்ரோல் மற்றும் டீசலுக்கான எரிபொருள் மானியத்தை மீண்டும் அறிமுகப்படுத்துவது குறித்து அரசாங்கம் பரிசீலித்து வருகிறது. வளைகுடா பிராந்தியத்தில் நிலைமை தண…

வளைகுடா பிராந்தியத்தில் நிலைமை தணிந்ததை அடுத்து, ஏப்ரல் மாதம் அறிமுகப்படுத்தப்பட்ட மூன்று மாத கால எரிபொருள் மானியத் திட்டத்தை அரசாங்கம் ஜூன் மாதத்துடன் முடிவுக்குக் கொண்டுவந்தது. இருப்பினும், உலக சந்தையில் மீண்டும் எண்ணெய் விலை கடுமையாக உயர்ந்துள்ளதால், அதன் சுமை பொதுமக்களின் மீது விழுவதைத் தவிர்க்க அரசாங்கம் விரும்புவதாக சிரேஷ்ட அதிகாரி ஒருவர் தெரிவித்துள்ளார்.

இந்த நடவடிக்கையின் மூலம், தற்போதுள்ள எரிபொருள் விலைகளைத் தக்கவைத்துக்கொண்டு, மேலதிகச் செலவை அரசாங்கமே ஏற்கும்.

முன்னர் வழங்கப்பட்ட மானியத்தின் கீழ், டீசல் ஒரு லீட்டருக்கு 100 ரூபாயும், பெட்ரோல் ஒரு லீட்டருக்கு 20 ரூபாயும் வழங்கப்பட்டதுடன், இதற்காக அரசாங்கம் 57 பில்லியன் ரூபாயை ஒதுக்கியிருந்தது.

"பெட்ரோல் மற்றும் டீசல் விலைகள் மேலும் அதிகரிப்பது பொதுமக்களுக்குப் பெரும் சுமையை ஏற்படுத்தும் என்பதால், மானியத்தை மீண்டும் அறிமுகப்படுத்துமாறு ஜனாதிபதியிடம் கோரிக்கை விடுக்கவுள்ளோம்" என்று அந்த அதிகாரி குறிப்பிட்டார்.

எரிபொருளுக்கான அடுத்த விலை திருத்தத்தின் போது தற்போதைய விலையைத் தக்கவைக்க உச்சகட்ட முயற்சிகள் எடுக்கப்பட்டு வருகின்றன. இருப்பினும், உலக சந்தையில் விலை தொடர்ந்து அதிகரித்தால், விலை உயர்வைத் தவிர்க்க முடியாது என அவர் எச்சரித்தார். கடந்த வாரத்தில் மட்டும் உலக எண்ணெய் விலை 14% க்கும் அதிகமாக உயர்ந்துள்ளது.

இதற்கிடையில், ரஷ்யாவைச் சேர்ந்த அரசு சார்ந்த இரண்டு நிறுவனங்கள், இலங்கைக்கு கச்சா எண்ணெய் மற்றும் சுத்திகரிக்கப்பட்ட எரிபொருள் பொருட்களை விநியோகிப்பதற்காக இலங்கை பெற்றோலியக் கூட்டுத்தாபனத்தில் (CPC) பதிவு செய்துள்ளன. "ரஷ்ய நிறுவனங்களின் வருகையால் சந்தையில் போட்டித்தன்மை அதிகரிக்கும்; இது உள்நாட்டில் எரிபொருள் விலையை நிலைப்படுத்த உதவும்" என்றும் அந்த அதிகாரி மேலும் தெரிவித்தார்.