சோப்பு உற்பத்தி, இறக்குமதிக்கான புதிய விதிமுறைகள் அறிமுகம்

இலங்கையில் விற்பனை செய்யப்படும் அனைத்து சோப்பு வகைகளின் பேக்கேஜிங்கிலும், குறிப்பிட்ட விபரங்களைக் கட்டாயம் காட்சிப்படுத்த வேண்டும் என நுகர்வோர் விவகார அதிகார சபை (Consumer Affairs Authority) அறிவுறுத்தியுள்ளது. 2003 ஆம் ஆண்டின் 9 ஆம் இலக்க நுகர்வோர் விவகார அதிகார சபையின் சட்டத்த…

2003 ஆம் ஆண்டின் 9 ஆம் இலக்க நுகர்வோர் விவகார அதிகார சபையின் சட்டத்தின் 10(1)(அ) பிரிவின் கீழ், இந்த விசேட வர்த்தமானி அறிவிப்பு வெளியிடப்பட்டுள்ளது.

புதிய விதிமுறையின் முக்கிய அம்சங்கள்:

தயாரிப்பின் பெயர்: உற்பத்தியின் பெயர் பிரதானப் பகுதியில் தடித்த எழுத்துக்களில் (Bold) அச்சிடப்பட வேண்டும். இது தமிழ், சிங்களம் மற்றும் ஆங்கிலம் ஆகிய மூன்று மொழிகளிலும் அல்லது ஏதேனும் இரண்டு மொழிகளிலும் இருக்க வேண்டும். அப்படி இரண்டு மொழிகளில் இருந்தால், மூன்றாவது மொழி பேக்கேஜிங்கின் வேறு பகுதியில் இடம் பெற வேண்டும்.

கொழுப்புச் சத்து (Total Fat Content): பேக் செய்யப்படும் நேரத்தில் இருந்த மொத்தக் கொழுப்புச் சத்தின் அளவு, சதவீதத்தில் (%) தடித்த எழுத்துக்களில் அச்சிடப்பட வேண்டும். இதன் குறைந்தபட்ச எழுத்து அளவு 2 மில்லிமீட்டராக இருக்க வேண்டும்.

எந்தெந்த சோப்புகளுக்குப் பொருந்தும்?

இந்தக் கட்டுப்பாடுகள் பின்வரும் அனைத்து சோப்பு வகைகளுக்கும் பொருந்தும்:

குழந்தைகளுக்கான சோப்பு (Baby Soap)

குளியல் சோப்பு (Body Soap / Bathing Bars)

ஷேவிங் சோப்பு (Shaving Soap)

கார்போலிக் சோப்பு (Carbolic Soap)

துணி துவைக்கும் சோப்பு (Laundry Soap)

மென் சோப்பு (Soft Soap)

இந்த நடவடிக்கை ஏன்?

உள்ளூர் சந்தையில் கிடைக்கும் பல சோப்புத் தயாரிப்புகளில், அவற்றில் அடங்கியுள்ள மூலப்பொருட்கள் மற்றும் கொழுப்புச் சத்து பற்றிய போதிய விபரங்கள் இல்லை என்ற நுகர்வோர் கவலைகளைத் தொடர்ந்தே இந்தத் தீர்மானம் எடுக்கப்பட்டுள்ளது. புகழ்பெற்ற பெரிய நிறுவனங்கள் ஏற்கனவே இத்தகைய நடைமுறைகளைப் பின்பற்றி வந்தாலும், பல சிறிய உள்நாட்டு மற்றும் இறக்குமதி செய்யப்பட்ட தயாரிப்புகள் இந்த விபரங்களை முறையாகக் குறிப்பிடுவதில்லை என்பது அதிகாரிகளின் அவதானிப்பாக உள்ளது.

நுகர்வோர் விவகார அதிகார சபையின் பதில் தலைவர் எஸ்.எம்.டி. சூரியகுமாரவின் பரிந்துரையின் பேரில் கொண்டுவரப்பட்டுள்ள இந்த புதிய விதிமுறைகள், 2027 ஜூலை 9, முதல் நடைமுறைக்கு வருகின்றன.