சுரங்கப்பாதை கட்டுமானப் பணியிடத்தில் நிலச்சரிவு; பலர் சிக்கியிருக்க அச்சம் (வீடியோ)

கேரள மாநிலம், வயநாடு மாவட்டம் மேப்பாடி அருகே உள்ள கல்லாடி பகுதியில், மீனாட்சி பாலம் பகுதியில் சுரங்கப்பாதை கட்டுமானப் பணி நடைபெற்று வரும் இடத்தில் ஏற்பட்ட பயங்கர நிலச்சரிவு அப்பகுதியில் பெரும் அதிர்ச்சியை ஏற்படுத்தியுள்ளது. மலப்புரம் மற்றும் வயநாடு மாவட்டங்களை இணைக்கும் ஆனக்கோம்…

கேரள மாநிலம், வயநாடு மாவட்டம் மேப்பாடி அருகே உள்ள கல்லாடி பகுதியில், மீனாட்சி பாலம் பகுதியில் சுரங்கப்பாதை கட்டுமானப் பணி நடைபெற்று வரும் இடத்தில் ஏற்பட்ட பயங்கர நிலச்சரிவு அப்பகுதியில் பெரும் அதிர்ச்சியை ஏற்படுத்தியுள்ளது.

மலப்புரம் மற்றும் வயநாடு மாவட்டங்களை இணைக்கும் ஆனக்கோம்போயில் - மேப்பாடி சுரங்கப்பாதை திட்டப் பணிகள் நடைபெற்று வரும் இடத்தில், கனமழையின் காரணமாக இந்த நிலச்சரிவு ஏற்பட்டுள்ளது.

இந்தச் சம்பவம் நடந்தபோது, கட்டுமானப் பணியில் ஈடுபட்டிருந்த ஊழியர்களின் வாகனங்கள் மண்ணுக்குள் புதைந்திருக்கலாம் என்றும், கட்டுமானப் பணியாளர்கள் தங்கியிருந்த இடங்கள் மற்றும் அருகே உள்ள வீடுகள், தங்கும் விடுதிகள் நிலச்சரிவில் சிக்கியிருக்கலாம் என்றும் அஞ்சப்படுகிறது.

சம்பவம் குறித்து தகவல் அறிந்ததும், கல்பெட்டாவைச் சேர்ந்த தீயணைப்பு மற்றும் மீட்புப் படையினர் உடனடியாக சம்பவ இடத்திற்கு விரைந்து வந்து மீட்புப் பணிகளைத் தொடங்கினர்.

தற்போது, காவல்துறை மற்றும் தேசிய பேரிடர் மீட்புப் படையினருடன் (NDRF) இணைந்து தீவிர மீட்புப் பணிகள் நடைபெற்று வருகின்றன.

இதுவரை உள்ளூர் மக்களின் உதவியுடன் காயமடைந்த நிலையில் ஐந்து பேர் மீட்கப்பட்டு மருத்துவமனைக்கு அனுப்பி வைக்கப்பட்டுள்ளனர்.

மீட்புப் பணிகளை விரைவுபடுத்துமாறு அமைச்சர் டி. சித்திக் உத்தரவிட்டுள்ள நிலையில், அவரும் வயநாடு மாவட்ட ஆட்சியரும் சம்பவ இடத்தில் இருந்து தேடுதல் பணிகளை ஒருங்கிணைத்து வருகின்றனர்.

கடந்த 2024 ஆம் ஆண்டு வயநாட்டில் ஏற்பட்ட பேரழிவு, 250-க்கும் மேற்பட்ட உயிர்களைப் பறித்து வரலாற்றில் மறக்க முடியாத வடுக்களை ஏற்படுத்திய நிலையில், தற்போதைய இந்த நிலச்சரிவு அப்பகுதி மக்களிடையே மீண்டும் கடும் அச்சத்தை உருவாக்கியுள்ளது.

தொடர்ந்து பெய்து வரும் மழையால் மீட்புப் பணிகளில் தொய்வு ஏற்பட்டுள்ள போதிலும், இடிபாடுகளில் சிக்கியவர்களை மீட்கும் போராட்டம் தீவிரமாக நடைபெற்று வருகிறது.