சுரேஷ் சலேவின் கைது: பல தலையீட்டு மனுக்கள் தாக்கல்

முன்னாள் அரச புலனாய்வு சேவைப் பணிப்பாளர் மேஜர் ஜெனரல் (ஓய்வுபெற்ற) சுரேஷ் சலேவின் கைது மற்றும் தடுத்து வைப்பு ஆகியவற்றின் சட்டபூர்வத்தன்மையைச் சவால் செய்து அவர் தாக்கல் செய்துள்ள ரிட் மனுவில், தம்மைத் தரப்பு பிரதிவாதிகளாக இணைத்துக்கொள்ளுமாறு கோரி பல தரப்பினர் மேல்முறையீட்டு நீதி…

முன்னாள் அரச புலனாய்வு சேவைப் பணிப்பாளர் மேஜர் ஜெனரல் (ஓய்வுபெற்ற) சுரேஷ் சலேவின் கைது மற்றும் தடுத்து வைப்பு ஆகியவற்றின் சட்டபூர்வத்தன்மையைச் சவால் செய்து அவர் தாக்கல் செய்துள்ள ரிட் மனுவில், தம்மைத் தரப்பு பிரதிவாதிகளாக இணைத்துக்கொள்ளுமாறு கோரி பல தரப்பினர் மேல்முறையீட்டு நீதிமன்றத்தில் மனுக்களைத் தாக்கல் செய்துள்ளனர்.

மனுதாரர்கள்: டாக்டர் குணதாச அமரசேகர, வணக்கத்திற்குரிய பெங்கமுவே நாலக தேரர், வணக்கத்திற்குரிய தபனே சுமன்வன்ஷ தேரர், திம்புலாகல ராகுலலங்கார தேரர், அகில இலங்கை பௌத்த காங்கிரஸ் தலைவர் சந்திர நிமல் வாகிஷ்ட மற்றும் உலகளாவிய இலங்கை மன்றம் (Global Sri Lankan Forum) ஆகிய தரப்பினரே இந்தத் தலையீட்டு மனுக்களைச் சமர்ப்பித்துள்ளனர்.

மனுவில் உள்ள முக்கிய அம்சங்கள்:

விசாரணைகளின் நம்பகத்தன்மை: சுரேஷ் சல்லேவின் கைது மற்றும் தடுத்து வைப்பு என்பன, ஏற்கனவே அதிகாரபூர்வ விசாரணைகளுக்கு உட்படுத்தப்பட்டு, நம்பகத்தன்மையற்றவை என நிராகரிக்கப்பட்ட குற்றச்சாட்டுகளின் அடிப்படையிலேயே மேற்கொள்ளப்பட்டுள்ளதாக மனுதாரர்கள் வாதிடுகின்றனர்.

ஆவணப்படத்தின் உண்மைத்தன்மை: சனல் 4 (Channel 4) தொலைக்காட்சி ஆவணப்படத்தில் முன்வைக்கப்பட்ட விடயங்கள், அதிகாரபூர்வ விசாரணைகளின் மூலம் நம்பகத்தன்மையற்றவை எனத் தீர்மானிக்கப்பட்டுள்ளதாகவும், அத்தருணத்தில் சுரேஷ் சல்லே இலங்கையில் இருக்கவில்லை என்பது விசாரணைகளில் உறுதியாகியுள்ளதாகவும் அவர்கள் சுட்டிக்காட்டியுள்ளனர்.

ஈஸ்டர் ஞாயிறு தாக்குதல்: 2019 ஈஸ்டர் ஞாயிறு தாக்குதல்கள் தொடர்பான பல அதிகாரபூர்வ விசாரணைகள், இந்தத் தாக்குதல்களுக்கு ஸஹ்ரான் ஹாஷிம் மற்றும் அவரது தேசிய தவ்ஹீத் ஜமாத் (NTJ)/ஐஎஸ் அமைப்புடன் தொடர்புடைய வலையமைப்பே பொறுப்பு என்பதை உறுதிப்படுத்தியுள்ளன. எந்தவொரு விசாரணையிலும் சுரேஷ் சல்லேவின் பெயர் இதில் தொடர்புபடுத்தப்படவில்லை என மனுதாரர்கள் குறிப்பிடுகின்றனர்.

நீதிமன்றத் தீர்ப்பு: உச்ச நீதிமன்றத்தின் ஏழு நீதிபதிகள் கொண்ட அமர்வு, அடிப்படை உரிமை மீறல் மனு (SC FR 163/2019) தொடர்பான விசாரணைகளின் போது, சுரேஷ் சலே அந்த வழக்கில் ஒரு தரப்பாக இருந்தபோதிலும் அவருக்கு எதிராக எந்தவிதமான பாதகமான முடிவுகளையும் எடுக்கவில்லை என்பதையும் அவர்கள் நீதிமன்றத்தின் கவனத்திற்குக் கொண்டு வந்துள்ளனர்.

மேஜர் ஜெனரல் சுரேஷ் சலே தாக்கல் செய்துள்ள ரிட் மனுவின் ஒரு அங்கமாகத் தம்மை இணைத்துக்கொள்வதன் மூலம், உண்மைகளை நீதிமன்றத்திற்குத் தெளிவுபடுத்த முடியும் எனத் தலையீட்டு மனுதாரர்கள் நம்பிக்கை தெரிவித்துள்ளனர்.