வீரவன்சவின்: ’நெத்த வெனுவெட்ட எத்த’ உயர் நீதிமன்றம் அதிரடி தீர்ப்பு

மக்கள் விடுதலை முன்னணியின் (JVP) பொதுச் செயலாளர் டில்வின் சில்வாவின் அறிவுசார் சொத்துரிமையை மீறியதாகக் குற்றம் சாட்டப்பட்டு, முன்னாள் பாராளுமன்ற உறுப்பினர் விமல் வீரவன்சவினால் தாக்கல் செய்யப்பட்டிருந்த மேன்முறையீட்டை உயர்ச நீதிமன்றம் வியாழக்கிழமை (09) அன்று தள்ளுபடி செய்தது. 'நெ…

'நெத்த வெனுவெட்ட எத்த' (Neththa Venuwata Aththa) என்ற புத்தகத்தில் டில்வின் சில்வாவின் ஆக்கங்களை அனுமதியின்றிப் பிரதியெடுத்ததாகத் தொடரப்பட்ட வழக்கிலேயே இந்தத் தீர்ப்பு வழங்கப்பட்டுள்ளது.

நீதியரசர்கள் சோபித ராஜகருண, ஜனக் டி சில்வா மற்றும் சம்பத் விஜயரத்ன ஆகியோர் அடங்கிய மூவர் கொண்ட அமர்வு இந்த ஒருமனதான தீர்ப்பை வழங்கியது.

இந்தத் தடையுத்தரவானது, சர்ச்சைக்குரிய அறிவுசார் சொத்துரிமை ஆவணங்களுக்கு மட்டுமே பொருந்தும் என்றும், வீரவன்சவின் முழுப் புத்தகத்திற்கும் அது பொருந்தாது என்றும் நீதிமன்றம் தெளிவுபடுத்தியது.

2005 ஜனாதிபதித் தேர்தலுக்கு முன்னதாக, மக்கள் விடுதலை முன்னணியின் மத்திய குழு விவாதங்களுக்காக டில்வின் சில்வாவினால் தயாரிக்கப்பட்ட இரண்டு ஆவணங்கள் இந்தச் சர்ச்சைக்குக் காரணமாகின. அந்த ஆவணங்களில் தனது சொந்த அரசியல் பகுப்பாய்வுகளும் பரிந்துரைகளும் இருந்ததாகவும், அவற்றை தனது அனுமதியின்றி விமல் வீரவன்ச தனது புத்தகத்தில் முழுமையாகப் பிரதியெடுத்துள்ளதாகவும் டில்வின் சில்வா குற்றம் சாட்டியிருந்தார்.

குறித்த ஆவணங்கள், அறிவுசார் சொத்துரிமைச் சட்டத்தின் கீழ் பாதுகாக்கப்பட வேண்டிய அசல் இலக்கியப் படைப்புகள் என்பதை உயர் நீதிமன்றம் உறுதிப்படுத்தியது.

கருத்துகளை விட, அந்த கருத்துகளின் அசல் வெளிப்பாடுகளே பதிப்புரிமையால் பாதுகாக்கப்படுகின்றன. டில்வின் சில்வாவின் எழுத்துகளில் போதுமான அறிவுசார் முயற்சி, தீர்ப்பு மற்றும் பகுப்பாய்வுத் திறன் வெளிப்படுவதால், அவை பதிப்புரிமைப் பாதுகாப்பிற்குத் தகுதியானவை என நீதிமன்றம் கண்டறிந்தது.

இத்தீர்ப்பானது, அரசியல் களத்தில் பதிப்புரிமை மற்றும் அறிவுசார் சொத்துரிமை விவகாரங்கள் எவ்வாறு கையாளப்பட வேண்டும் என்பதற்கான ஒரு முக்கியமான முன்னுதாரணமாகக் கருதப்படுகிறது. அரசியல் தலைவர்கள் வெளியிடும் படைப்புகளில் மற்றவர்களின் உழைப்பு பயன்படுத்தப்படும்போது, உரிய அங்கீகாரம் அல்லது அனுமதி பெறுவது சட்டப்படி கட்டாயமானது என்பதை இந்தத் தீர்ப்பு மீண்டும் வலியுறுத்தியுள்ளது.