விமான நிலையத்தை மேம்படுத்த 19 முதலீட்டு முன்மொழிவுகள்

மத்தள ராஜபக்ச சர்வதேச விமான நிலையத்தின் (MRIA) வளங்களைப் பயன்படுத்தி, வணிக ரீதியாக மேம்படுத்துவதற்காக அழைப்பு விடுக்கப்பட்டிருந்த முதலீட்டு முன்மொழிவுகளுக்கு (EOI) மொத்தம் 19 விண்ணப்பங்கள் கிடைத்துள்ளதாக துறைமுக மற்றும் சிவில் விமான சேவைகள் அமைச்சு தெரிவித்துள்ளது. முதலீட்டாளர்க…

முதலீட்டாளர்களின் ஆர்வம்: இவ்விண்ணப்பங்களைச் சமர்ப்பித்தவர்களில் மத்திய கிழக்கு நாடுகள், இந்தியா மற்றும் சீனா ஆகியவற்றைச் சேர்ந்த முன்னணி நிறுவனங்கள் பல உள்ளடங்கியுள்ளன.

விமான நிலைய மற்றும் விமான சேவைகள் (இலங்கை) நிறுவனத்தின் சார்பாக, உள்நாட்டு மற்றும் வெளிநாட்டு முதலீட்டாளர்களுக்கு வணிக வாய்ப்புகளை மேம்படுத்துவதற்காக இந்த விண்ணப்பங்கள் கோரப்பட்டிருந்தன. கடந்த ஜூலை 09 ஆம் திகதி அமைச்சில் வைத்து இந்த விண்ணப்பங்கள் அனைத்தும் திறக்கப்பட்டன.

முதலீட்டுப் பகுதிகள்: பெறப்பட்ட முன்மொழிவுகள் முக்கியமாக இரண்டு பிரிவுகளின் கீழ் வகைப்படுத்தப்பட்டுள்ளன:

விமானப் போக்குவரத்துச் செயற்பாடுகள் (Airside/Aerodrome Operations): விமான நிலையத்தின் உட்புறப் பகுதியில் மேற்கொள்ளப்படும் சிவில் விமானச் செயற்பாடுகள்.

நிலவழிச் செயற்பாடுகள் (Landside Operations): விமான நிலையத்தின் உட்புற மற்றும் வெளிப்புறப் பகுதியில் மேற்கொள்ளப்படும் இதர வணிக நடவடிக்கைகள்.

முதலீட்டாளர்கள், இத்தகைய திட்டங்களை நிர்வகிப்பதிலும் மேம்படுத்துவதிலும் தமக்குள்ள தகுதிகள் மற்றும் அனுபவங்களை நிரூபிக்க வேண்டியது கட்டாயமாக்கப்பட்டிருந்தது.

அடுத்தகட்ட நடவடிக்கைகள்: அமைச்சரவையால் நியமிக்கப்பட்ட பேச்சுவார்த்தைக் குழுவின் (CANC) கீழ், இதற்கென நியமிக்கப்பட்ட திட்டக் குழு, சமர்ப்பிக்கப்பட்ட விண்ணப்பங்களை மதிப்பீடு செய்யவுள்ளது. இதன் மூலம் வணிகச் செயற்பாடுகளுக்குப் பொருத்தமான முதலீட்டாளர்கள் அடையாளம் காணப்படுவார்கள்.

தெரிவுசெய்யப்படும் விண்ணப்பதாரிகள், அடுத்தகட்ட கொள்முதல் செயல்முறையான முன்மொழிவு கோரலுக்கு (RFP) அழைக்கப்படுவார்கள். முதலீட்டாளர்களுக்குத் தகுந்த கால அவகாசம் வழங்கும் நோக்கில், இதற்கான காலக்கெடு முன்னதாக நீட்டிக்கப்பட்டிருந்தது குறிப்பிடத்தக்கது.

ஏன் இந்த முதலீட்டுத் தேடல்? விமான நிலையத்தின் வணிகச் சாத்தியத்தன்மையை மேம்படுத்தும் நோக்கில் அரசாங்கம் இந்த முயற்சியை மேற்கொண்டுள்ளது.

அண்மைய தணிக்கை அறிக்கையின்படி, மத்தள ராஜபக்ச சர்வதேச விமான நிலையம் கடந்த ஆறு ஆண்டுகளில் சுமார் 39.3 பில்லியன் ரூபா நிகர நஷ்டத்தைச் சந்தித்துள்ளமை தெரியவந்துள்ளது.

இந்த நிதிப் பின்னடைவைச் சீர்செய்து, விமான நிலையத்தைப் பொருளாதார ரீதியாக லாபமீட்டும் மையமாக மாற்ற அரசாங்கம் முன்னெடுக்கும் நடவடிக்கைகளில் இது மிக முக்கியமான மைல்கல்லாகும்.