பிலிப்பைன்ஸின் மலைப்பகுதியான அபயாவ் (Apayao) மாகாணத்தைச் சேர்ந்த இரண்டு வயது சிறுவன் Jaren Gamongan, முகத்தின் சில பகுதிகள், கழுத்து, முதுகு, கைகள் மற்றும் கால்களில் வழக்கத்திற்கு மாறாக அதிகமான முடி வளர்ச்சியுடன் பாதிக்கப்பட்டுள்ளான். இவனது தாயான Alma-வுக்கு மூன்று குழந்தைகள் உள…
பிலிப்பைன்ஸின் மலைப்பகுதியான அபயாவ் (Apayao) மாகாணத்தைச் சேர்ந்த இரண்டு வயது சிறுவன் Jaren Gamongan, முகத்தின் சில பகுதிகள், கழுத்து, முதுகு, கைகள் மற்றும் கால்களில் வழக்கத்திற்கு மாறாக அதிகமான முடி வளர்ச்சியுடன் பாதிக்கப்பட்டுள்ளான். இவனது தாயான Alma-வுக்கு மூன்று குழந்தைகள் உள்ள நிலையில், இந்த குழந்தை மட்டுமே இத்தகைய நிலையுடன் பிறந்துள்ளான்.
வைத்தியர்களின் பரிசோதனைக்குப் பிறகு, இவனுக்கு 'Hypertrichosis' (ஹைப்பர்ட்ரைகோசிஸ்) எனப்படும் அரிதான நிலை இருப்பது கண்டறியப்பட்டுள்ளது. இது வயதிற்கு இயல்பாக எதிர்பார்க்கப்படுவதை விட, உடலின் சில பகுதிகளில் அதிகப்படியான முடி வளர்ச்சியை ஏற்படுத்தும் ஒரு மருத்துவ நிலையாகும்.
Jaren பிறப்பதற்கு முன்பு கர்ப்ப காலத்தில் தனக்கு காட்டுப் பூனை இறைச்சி சாப்பிட வேண்டும் என ஆசை ஏற்பட்டதாக அவனது தாய் Alma கூறியிருந்தார். இதைக் கேள்வியுற்ற சிலர், உள்ளூர் மூடநம்பிக்கைகளின் அடிப்படையில் குழந்தையின் தோற்றத்துடன் அதனைத் தொடர்புபடுத்திப் பேசினர்.
எனினும், கர்ப்ப காலத்தில் தாய் சாப்பிட்ட உணவுக்கும் குழந்தையின் இந்த நிலைக்கும் எந்தவிதத் தொடர்பும் இல்லை என்று மருத்துவர்கள் தெளிவுபடுத்தியுள்ளனர்.
பிறவியிலேயே ஏற்படும் 'Hypertrichosis' இன் சில வடிவங்கள் மரபணு மாற்றங்களுடன் தொடர்புடையவை என்றும், இந்த மாற்றங்கள் பெற்றோரிடமிருந்து பரம்பரையாக வரலாம் அல்லது கருவின் வளர்ச்சியின்போது இயற்கையாகவே ஏற்படலாம் என்றும் மருத்துவர்கள் விளக்கியுள்ளனர்.
அதிகப்படியான முடி வளர்ச்சி இருந்தாலும், Jaren ஒரு மகிழ்ச்சியான மற்றும் விளையாட்டுத்தனமான குழந்தையாகவே வளர்கிறான்.
எனினும், வெப்பமான காலநிலையில் அதிகமாக வியர்ப்பதன் காரணமாக அவனுக்குத் தோலில் அரிப்பு மற்றும் அசௌகரியங்கள் ஏற்படுகின்றன. அவனது குடும்பத்தினர் முடியை வெட்டிப் பார்த்த போதிலும், அது மீண்டும் வேகமாக வளர்ந்தது.
பொதுவாக முடியை வெட்டுவதாலோ அல்லது ஷேவ் செய்வதாலோ அது தடிமனாகவோ வேகமாகவோ வளராது. இருப்பினும், வெட்டப்பட்ட முடியின் முனைகள் மழுங்கலாக இருப்பதால், சில காலத்திற்கு அது முன்பைவிட அதிக தடிமனாக இருப்பது போல் தோன்றலாம்.
தற்போது இந்த நிலைக்கான ஒரே ஒரு நிரந்தரச் சிகிச்சை முறையும் இல்லை. எனினும், முடி வளர்ச்சியைைக் கட்டுப்படுத்த லேசர் மூலமாக முடிகளை அகற்றும் முறை (Laser Hair Reduction) அல்லது எலக்ட்ரோலைசிஸ் (Electrolysis) போன்ற மருத்துவ முறைகள் உதவக்கூடும். எனினும், அவற்றுக்கு மருத்துவ மேற்பார்வையின் கீழ் பல அமர்வுகள் தேவைப்படுவதோடு, அதிகச் செலவும் பிடிக்கும்.
மருத்துவச் செலவுகளைத் தாண்டி, Jaren பிற்காலத்தில் பள்ளிக்குச் செல்லத் தொடங்கும்போது, மற்ற குழந்தைகளும் சமூகமும் அவனை எவ்வாறு நடத்துவார்கள் என்பதே அவனது தாயின் மிகப்பெரிய கவலையாக உள்ளது.
"என் மகன் தன்னம்பிக்கையுடன், மகிழ்ச்சியாக வளர வேண்டும். அவனுடைய மருத்துவ நிலை அவனுடைய மதிப்பை ஒருபோதும் தீர்மானிக்கக்கூடாது" என்பதே தாயின் ஒரே ஆசையாக உள்ளது.
