சந்தோஷுடன் கரம் கோர்த்தார் ’சுப்ரமணியபுரம்’ நாயகி

'சுப்ரமணியபுரம்' படத்தின் மூலம் தமிழ் ரசிகர்களின் மனதை வென்ற 'சுப்ரமணியபுரம் ஸ்வாதி', தனது புதிய வாழ்க்கையைத் தொடங்கியுள்ளதை அறிந்து கோலிவுட் ரசிகர்களும் மிகுந்த மகிழ்ச்சியில் உள்ளனர். பிரபல நடிகை ஸ்வாதி ரெட்டி, தன்னை வைத்து 'மன்த் ஆஃப் மது' (Month of Madhu) திரைப்படத்தை இயக்கிய…

'சுப்ரமணியபுரம்' படத்தின் மூலம் தமிழ் ரசிகர்களின் மனதை வென்ற 'சுப்ரமணியபுரம் ஸ்வாதி', தனது புதிய வாழ்க்கையைத் தொடங்கியுள்ளதை அறிந்து கோலிவுட் ரசிகர்களும் மிகுந்த மகிழ்ச்சியில் உள்ளனர்.

பிரபல நடிகை ஸ்வாதி ரெட்டி, தன்னை வைத்து 'மன்த் ஆஃப் மது' (Month of Madhu) திரைப்படத்தை இயக்கிய இயக்குநர் சந்தோஷ் நகோத்தியை இரண்டாவது திருமணம் செய்துகொண்டுள்ளார். இவர்களது திருமணம் ஜூலை 8, 2026 அன்று எளிமையான முறையில் நடைபெற்றுள்ளது.

தங்கள் திருமண செய்தியை ஸ்வாதி மற்றும் சந்தோஷ் இருவரும் தத்தமது இன்ஸ்டாகிராம் பக்கங்களில் அதிகாரப்பூர்வமாகப் பகிர்ந்துள்ளனர்.

திருமணத்தின் போது எடுக்கப்பட்ட, முகங்கள் தெரியாத இரண்டு புகைப்படங்களை மட்டும் பதிவிட்டு, "08-07-2026 அன்று எங்கள் திருமணம் இனிதே நடைபெற்றது" என்று அவர்கள் நெகிழ்ச்சியுடன் குறிப்பிட்டுள்ளனர்.

இந்தத் திருமண அறிவிப்பைத் தொடர்ந்து, நடிகர் நவீன் சந்திரா முதலில் தனது வாழ்த்துகளைத் தெரிவித்தார். மேலும் விஷ்ணு விஷாலின் மனைவி ஜுவாலா கட்டா, நடிகை லட்சுமி மஞ்சு, நடிகர் தேஜ் உள்ளிட்ட திரையுலகப் பிரபலங்கள் பலரும் இந்த இணையருக்குத் தங்களது வாழ்த்துகளைத் தெரிவித்துள்ளனர். ரசிகர்களும் சமூக வலைதளங்களில் அன்பையும் வாழ்த்துகளையும் அள்ளி வீசி வருகின்றனர்.

நடிகை ஸ்வாதி ரெட்டிக்கு இது இரண்டாவது திருமணமாகும். முன்னதாக 2018-ஆம் ஆண்டு விமானி விகாஸ் வாசுவை அவர் திருமணம் செய்திருந்தார்.

பின்னர் 2023-ஆம் ஆண்டு வாக்கில் விகாஸுடன் அவருக்கு விவாகரத்து ஏற்பட்டதாகப் பேசப்பட்டது. இது குறித்து அதிகாரப்பூர்வமான விளக்கத்தை அளிக்காத ஸ்வாதி, தனது பழைய திருமண புகைப்படங்களை சமூக வலைதளங்களில் இருந்து நீக்கிவிட்டுத் தனிப்பட்ட வாழ்க்கையில் அமைதி காத்து வந்தார்.

தற்போது தன்னுடைய பட இயக்குநரான சந்தோஷ் நகோத்தியை மணந்துள்ள ஸ்வாதிக்கு, ரசிகர்கள் "கடவுள் உங்களுக்கு வழங்கிய இரண்டாவது வாய்ப்பு இது; இந்த வாழ்க்கை இனிமையாகவும் மகிழ்ச்சியாகவும் அமையட்டும்" என்று மனதார வாழ்த்தி வருகின்றனர்.