மாஸ்கோவின் மையப்பகுதியில் அமைந்துள்ள பிரபல உணவகம் ஒன்றில் இடம்பெற்ற பயங்கர குண்டுவெடிப்பில் 5 பேர் உயிரிழந்துள்ளனர். புச்சா படுகொலைகளுடன் தொடர்புடைய பிரபல ஜெனரல் ஒருவரின் பிறந்தநாள் விருந்தைக் குறி வைத்தே இந்தத் தாக்குதல் நடத்தப்பட்டதாகத் தகவல்கள் வெளியாகியுள்ளன. கர்னல்-ஜெனரல் அ…
மாஸ்கோவின் மையப்பகுதியில் அமைந்துள்ள பிரபல உணவகம் ஒன்றில் இடம்பெற்ற பயங்கர குண்டுவெடிப்பில் 5 பேர் உயிரிழந்துள்ளனர். புச்சா படுகொலைகளுடன் தொடர்புடைய பிரபல ஜெனரல் ஒருவரின் பிறந்தநாள் விருந்தைக் குறி வைத்தே இந்தத் தாக்குதல் நடத்தப்பட்டதாகத் தகவல்கள் வெளியாகியுள்ளன.
கர்னல்-ஜெனரல் அலெக்சாண்டர் சைகோ (Alexander Chayko), உயர் மட்ட இராணுவ அதிகாரிகள், அரசியல்வாதிகள் மற்றும் உயர்மட்ட அதிகாரிகளுடன் இணைந்து தனது பிறந்தநாளைக் கொண்டாடிக்கொண்டிருந்தபோதே இந்தச் சொந்தத் தயாரிப்புக் குண்டு வெடித்துச் சிதறியுள்ளது.
இந்தத் தாக்குதலில் மூன்று பேர் சம்பவ இடத்திலும், காயமடைந்து மருத்துவமனையில் அனுமதிக்கப்பட்டவர்களில் இருவரும் சிகிச்சை பலனின்றி உயிரிழந்ததை அடுத்து, மொத்த பலி எண்ணிக்கை ஞாயிற்றுக்கிழமை அன்று ஐந்தாக உயர்ந்துள்ளது. மேலும் பலரும் படுகாயமடைந்துள்ளனர்; சிலரது உறுப்புகள் முற்றிலுமாகச் சேதமடைந்துள்ளதாகத் தகவல்கள் தெரிவிக்கின்றன.
குத்ரின்ஸ்கயா சதுக்கத்தில் (Kudrinskaya Square) உள்ள ஸ்டாலின் காலத்து உயரமான கட்டிடத்தில் இயங்கும் 'பால்சி ரோசி' (Balzi Rossi) உணவகத்தின் திறந்தவெளிச் பரண் பகுதியில் கூடியிருந்த விருந்தினர்களைக் குறிவைத்தே இந்தக் குண்டுவெடிப்புத் திட்டமிடப்பட்டுள்ளது. சுமார் £85,000 செலவில் ஏற்பாடு செய்யப்பட்டிருந்த இந்த விருந்துக்கு, அடையாளம் தெரியாத பெண் ஒருவர் பரிசுக் பொருள் ஒன்றுடன் வந்துள்ளார். எனினும், நுழைவாயிலில் பாதுகாப்புக் படையினரால் அவர் தடுத்து நிறுத்தப்பட்டார்.
பாதுகாப்புத்துறையினர் அந்தப் பொதியைப் பரிசோதித்தபோது, அது திடீரென வெடித்துச் சிதறியுள்ளது. ஒரு கிலோ டி.என்.டி (TNT) வெடிமருந்தின் சக்திக்கு இணையான மற்றும் உலோகத் துகள்கள் நிரப்பப்பட்ட இந்தக் குண்டு வெடித்ததில், அப்பெண் உள்பட மூவர் உடனடியாக உயிரிழந்தனர்.
உக்கிரமான இந்தத் தாக்குதலின் பின்னணியில் உக்ரைனின் ரகசியப் பிரிவினர் இருக்கலாம் எனச் சந்தேகிக்கப்படுகிறது. கடந்த வாரம் தனது 55 வது பிறந்தநாளைக் கொண்டாடிய கர்னல்-ஜெனரல் சைகோ, 2022 ஆம் ஆண்டு புட்டின் உக்ரைன் மீதான ஆரம்ப படையெடுப்பின் போது கீவ் முனையில் ரஷ்யப் படைகளின் தளபதியாகப் பணியாற்றினார்.
புச்சாவில் நடைபெற்ற கொடூரத் தாக்குதல்களின்போது இவரது படைகள் கடுமையான போர்க்குற்றங்களில் ஈடுபட்டதாகக் குற்றம் சாட்டப்பட்டுள்ளது. தற்போது விளாடிமிர் புட்டினின் வான்வழி அணு ஆயுதப் படைகளின் பொறுப்பில் உள்ள இந்த ஜெனரல், இந்தத் தாக்குதலில் உயிரிழக்கவில்லை அல்லது காயமடையவில்லை எனத் தெரியவந்துள்ளது.
சம்பவ இடத்திற்கு விரைந்த பொலிஸாரும் அவசர ஊர்திப் பணியாளர்களும் காயமடைந்தவர்களை மீட்டு மருத்துவமனைக்குச் சென்றனர். ரஷ்ய ஆயுதப் படைகளின் கருப்பு நிற இலக்கத் தகடுகளைக் கொண்ட பல சொகுசு வாகனங்கள் அங்கு காணப்பட்டதாக நேரில் கண்டசாட்சிகள் தெரிவித்தனர்.
இந்தச் சம்பவம் குறித்து எஃப்.எஸ்பி (FSB) பாதுகாப்பு அதிகாரிகளும் பொலிஸாரும் தீவிர விசாரணைகளை முன்னெடுத்து வருகின்றனர்.
