உணவு உலகில் புதிய டிரெண்டாகும் ’ஊபே’

லட்டே (Lattes) மற்றும் கேக்குகள் முதல் ஐஸ்கிரீம் வரை, 'ஊபே' (Ube) அதன் துடிப்பான ஊதா நிறத்தால் அனைவரையும் கவர்ந்து வருகிறது. பிலிப்பைன்ஸ் நாட்டுச் சர்க்கரைவள்ளிக் கிழங்கான இது, 'மட்சா' (Matcha) தேநீருக்கு அடுத்தபடியாகப் பெரும் உணவுப் புரட்சியை ஏற்படுத்தும் என்று எதிர்பார்க்கப்பட…

தற்போது நகரக் கஃபேக்களில் உலாவரும் எவரும், வழக்கத்திற்கு மாறான அடர் ஊதா நிறத்திலான பானங்கள் மற்றும் பேஸ்ட்ரிகளை (pastries) அதிகமாகக் காணலாம். இந்த நிறம் செயற்கையான உணவுச் சாயங்களிலிருந்து வரவில்லை; மாறாக, தென்கிழக்கு ஆசியாவைச் சேர்ந்த ஊதா நிறச் சர்க்கரைவள்ளிக் கிழங்கான 'ஊபே'-யிலிருந்து கிடைக்கிறது.

ஊபே என்றால் என்ன?

'ஊபே' (உச்சரிப்பு: "ஊ-பே") என்பது முக்கியமாகப் பிலிப்பைன்ஸில் வளர்க்கப்படும் ஒரு வகை கிழங்கு ஆகும். 'டெர் ஃபைன்ஷ்மெக்கர்' (Der Feinschmecker) இதழின்படி, பிலிப்பைன்ஸ் மக்களின் அன்றாட உணவில் இது பல நூற்றாண்டுகளாக ஒரு அங்கமாக இருந்து வருகிறது. உலகின் பிற பகுதிகளில் சர்க்கரைவள்ளிக் கிழங்கு எவ்வளவு முக்கியமோ, அவ்வளவு முக்கியத்துவம் வாய்ந்தது இது. ஊபே மற்றும் ஊதா நிறச் சர்க்கரைவள்ளிக் கிழங்குகள் பார்ப்பதற்கு ஒரே மாதிரியாகத் தெரிந்தாலும், தாவரவியல் ரீதியாக இவை இரண்டும் வெவ்வேறானவை.

ஊதா நிறச் சர்க்கரைவள்ளிக் கிழங்கு அல்லது 'வாட்டர் யாம்' (Water yam) என்றும் அழைக்கப்படும் இந்தத் கிழங்கு, அடர் ஊதா முதல் வெளிர் ஊதா நிறம் வரை பல வண்ணங்களில் காணப்படுகிறது. ஜெர்மனியில் ஊபே பெரும்பாலும் கூழ் (purée), பொடி, பேஸ்ட் அல்லது சிரப் வடிவிலேயே உணவுகளில் பயன்படுத்தப்படுகிறது.

இதன் தனித்துவமான சுவை என்ன?

ஊபே லேசான நட்ஸ் சுவையுடன், வனி மற்றும் பிஸ்தா குறிப்புகளையும், சமைத்த கேரட் அல்லது சர்க்கரைவள்ளிக் கிழங்கை ஒத்த இயற்கையான இனிப்புத் தன்மையையும் கொண்டது. 'லெபென்ஸ்பிட்டல் ஜீத்துங்' (Lebensmittel Zeitung) இதழ் குறிப்பிடுவது போல, ஊபே அதன் ஊதா நிறத்தால் புதியதாகத் தோன்றினாலும், அதன் சுவை நம் அனைவருக்கும் சிறுவயதிலிருந்தே பரிச்சயமான ஒன்றாக இருக்கிறது. புல் போன்ற கசப்புச் சுவை கொண்ட 'மட்சா'வை விட, ஊபே மக்கள் எளிதில் விரும்பக்கூடிய சுவையைக் கொண்டிருப்பது இதன் வணிக ரீதியான பலமாகும்.

பேஸ்ட்ரி கடைகளில் மக்ரூன்கள், சீஸ்கேக், ஐஸ்கிரீம் மற்றும் சிஃப்பான் கேக்குகளுக்கு ஊபே அருமையான சுவையையும், எந்தவிதமான செயற்கை நிறமூட்டிகளும் இன்றி இயற்கையான ஊதா நிறத்தையும் தருகிறது.

பானங்களில் ஊபே

தற்போது நட்சத்திரக் கஃபேக்களில் 'ஊபே லட்டே' பெரும் வரவேற்பைப் பெற்றுள்ளது. ஸ்டார்பக்ஸ் (Starbucks) போன்ற பெரிய நிறுவனங்கள் இதனைத் தங்கள் மெனுவில் சேர்த்துள்ளன. கோடைகாலத்தில் குளிர்ந்த 'ஐஸ்டு ஊபே லட்டே' மிகவும் பிரபலம்; கண்ணாடி டம்ளரில் தெரியும் அந்த ஊதா நிறம் இன்ஸ்டாகிராமில் பகிரத் தகுந்த அழகைத் தருகிறது.

ஆரோக்கிய நன்மைகள்

இதன் அடர் ஊதா நிறத்திற்கு 'ஆந்தோசயினின்' (Anthocyanins) எனும் இயற்கையான நிறமிதான் காரணம். இது ஆன்டி-ஆக்ஸிடன்ட், வைரஸ் எதிர்ப்பு, பாக்டீரியா எதிர்ப்பு மற்றும் அழற்சி எதிர்ப்புத் தன்மைகளைக் கொண்டது என்று பெடரல் சென்டர் ஃபார் நியூட்ரிஷன் (BZfE) விளக்குகிறது. ஊபேயில் வைட்டமின் A, C மற்றும் E, நார்சத்து, பொட்டாசியம் மற்றும் தாமிரம் ஆகியவை நிறைந்துள்ளன.

ஜெர்மனியில் ஊபே கிடைக்குமா?

ஜெர்மனியில் பெரிய சூப்பர் மார்க்கெட்களில் ஊபே அரிதாகவே கிடைக்கிறது. ஆசிய சூப்பர் மார்க்கெட்களில் பொடி அல்லது பேஸ்ட் வடிவில் இதைப் பெறலாம். வீட்டில் சமைப்பவர்கள் 'ஊபே ஹலயா' (ube halaya) எனப்படும் ஊபே கூழைப் பயன்படுத்தி கேக் அல்லது ஐஸ்கிரீம் செய்யலாம்.

இந்த டிரெண்டின் மறுபக்கம்

எந்தவொரு உணவுக்கும் திடீரென உலக அளவில் தேவை அதிகரிக்கும் போது, அது நீண்டகாலமாக இருந்து வரும் விவசாயக் கட்டமைப்புகளைச் சிதைக்கிறது என்று பெடரல் சென்டர் ஃபார் நியூட்ரிஷனின் பிரிட்டா க்ளீன் எச்சரிக்கிறார். சமூக ஊடகங்களால் தூண்டப்படும் இத்தகைய மோகங்கள், பிலிப்பைன்ஸ் போன்ற நாடுகளின் விவசாயத்தைப் பாதிக்கின்றன. மேலும், ஆசியா மற்றும் ஆப்பிரிக்காவின் பிற வெப்பமண்டல நாடுகளும் இதனைப் பயிரிடத் தொடங்கியுள்ளன. ஜெர்மனிக்கு இது நீண்ட தூரம் பயணம் செய்து வருவதால், இதற்கான 'காலநிலை தடம்' (climate footprint) மிகவும் அதிகமாக உள்ளது என்பதும் கவனத்தில் கொள்ள வேண்டிய ஒன்று.