வாட்ஸ்அப்பில் புதிய வசதி: நீங்கள் என்ன செய்யவேண்டும்?

கணக்குகளைக் கைப்பற்றுவதையும் (Account takeovers) மோசடி அழைப்புகளையும் கடினமாக்கும் வகையில், வாட்ஸ்அப் புதிய பாதுகாப்பு அம்சங்களை அறிமுகப்படுத்தியுள்ளது. இந்தச் செயலியில் பயன்பாட்டில் இருந்த ஆறு இலக்க இருபக்க சரிபார்ப்பு பின் (6-digit two-step verification PIN) எண்ணுக்குப் பதிலாக…

கணக்குகளைக் கைப்பற்றுவதையும் (Account takeovers) மோசடி அழைப்புகளையும் கடினமாக்கும் வகையில், வாட்ஸ்அப் புதிய பாதுகாப்பு அம்சங்களை அறிமுகப்படுத்தியுள்ளது.

இந்தச் செயலியில்  பயன்பாட்டில் இருந்த ஆறு இலக்க இருபக்க சரிபார்ப்பு பின் (6-digit two-step verification PIN) எண்ணுக்குப் பதிலாக, கூடுதல் பாதுகாப்புமிக்க கடவுச்சொல் (Password) முறை கொண்டுவரப்பட்டுள்ளது. மேலும், பயனர்கள் பல்வேறு சாதனங்களில் பல  Passkeys  உருவாக்கும் வசதியும் விரைவில் வழங்கப்படவுள்ளது.

இந்த அப்டேட் மூலம், அறியப்படாத எண்களிலிருந்து அழைப்புகள் வரும்போது ஆண்ட்ராய்டு (Android) பயனர்களுக்குக் கூடுதல் தகவல்கள் வழங்கப்படும். அழைப்பவர் வெளிநாட்டைச் சேர்ந்தவரா அல்லது பெறுநருடன் ஏதேனும் பொதுவான குழுக்களில் (Shared groups) உள்ளாரா போன்ற விவரங்களை இனி வாட்ஸ்அப் காட்டும். தொழில்நுட்ப ரீதியாக ஹேக் செய்வதை விட, சமூகப் பொறியியல் (Social engineering) முறைகளையே மோசடி செய்பவர்கள் அதிகம் பயன்படுத்தி வருவதைத் தொடர்ந்து இந்த மாற்றங்கள் செய்யப்பட்டுள்ளன.

வாட்ஸ்அப்பில் கடந்த 2017-ஆம் ஆண்டு முதல் ஆறு இலக்க பின் (PIN) அடிப்படையிலான இருபக்க சரிபார்ப்பு முறை செயல்பாட்டில் இருந்தது. இனி பயனர்கள் அந்த பின் எண்ணுக்குப் பதிலாக எழுத்துகள், எண்கள் மற்றும் சிறப்புக்குறிகள் அடங்கிய கடவுச்சொல்லைத் தேர்ந்தெடுக்கலாம்.

இந்தக் கடவுச்சொல்லில் குறைந்தபட்சம் ஒரு எண் மற்றும் ஒரு எழுத்து இருக்க வேண்டும் என்றும், இது குறைந்தபட்சம் எட்டு எழுத்துகளைக் கொண்டிருக்க வேண்டும் என்றும் வாட்ஸ்அப் தெரிவித்துள்ளது. பயனர்கள் Settings > Account > Password பகுதிக்குச் சென்று இதனை அமைத்துக் கொள்ளலாம்.

எளிமையான பின் எண்களை ஊகிப்பது எளிது என்பதால், இந்த மாற்றம் கணக்குகளை எளிதில் ஊடுருவ முடியாதவாறு பாதுகாக்கும். பயனர்கள் எளிதில் யூகிக்கக்கூடிய அல்லது பொதுவாகப் பயன்படுத்தப்படும் கடவுச்சொற்களைத் தவிர்த்தால் மட்டுமே வலுவான கடவுச்சொல் மூலம் பாதுகாப்பு அதிகரிக்கும்.