விபத்தில் ஏழு பேர் பலி: சாரதிக்கு 13 வருட கடூழியச் சிறை உறுதி

2017ஆம் ஆண்டு சிலாபம் பகுதியில் இடம்பெற்ற கோரமான வீதி விபத்து ஒன்றில் 7 பேர் உயிரிழக்கக் காரணமாகவிருந்த தனியார் பேருந்து சாரதி ஒருவரின் மேன்முறையீட்டை மேன்முறையீட்டு நீதிமன்றம் தள்ளுபடி செய்துள்ளதுடன், அவருக்கு விதிக்கப்பட்ட 13 ஆண்டுகள் மற்றும் மூன்று மாதக் கடூழியச் சிறைத்தண்டனை…

பேருந்து மணிக்கு 80 கி.மீ முதல் 120 கி.மீ வரையிலான அதீத வேகத்தில் சென்றதாகவும், பக்கவாட்டில் அசைந்தபடியும், ஆபத்தான முறையில் முந்திச் சென்றதுடன் மற்றொரு பேருந்துடன் பந்தயத்தில் ஈடுபட்டதாகவும் நீதிமன்றம் அவதானித்தது. மேலும், இது வீதியின் இடதுபுறத்தில் சென்ற முச்சக்கரவண்டியின் பின் பகுதியில் மோதியதுடன், வீதியை விபத்துக்குள்ளாகித் தாண்டிச் சென்று ஒரு பாலம் அல்லது மதகில் மோதி கவிழ்ந்துள்ளது.

நீதிபதிகள் அமல் ராஜாராஜா மற்றும் டாக்டர் சுமுது பிரேமச்சந்திர ஆகியோர் அடங்கிய இரு நீதிபதிகள் கொண்ட அமர்வு ஓகஸ்ட் 25ஆம் திகதி இந்தத் தீர்ப்பை வழங்கியது. புத்தளம் மேல் நீதிமன்றத்தால் விதிக்கப்பட்ட தண்டனை சட்டப்பூர்வமானது என்றும், இழைக்கப்பட்ட குற்றங்களுக்கு அது அதிகப்படியானதோ அல்லது விகிதாசாரமற்றதோ அல்ல என்றும் நீதிமன்றம் முடிவு செய்தது.

இந்த மேன்முறையீடானது, 2017 நவம்பர் 6ஆம் திகதி A-3 வீதியில் முந்தலம பாலத்திற்கு அருகில் நிகழ்ந்த வாகன விபத்து தொடர்பானது ஆகும். அரச தரப்பு சாட்சியங்களின்படி, கொழும்பிலிருந்து யாழ்ப்பாணம் நோக்கிப் பயணிகளை ஏற்றிச் சென்ற நெரிசலான பேருந்தை, பிரதிவாதியான முஹம்மது ஜிப்ரி முஹம்மது வஹில் என்பவர் மிகவும் பொறுப்பற்ற முறையில் ஓட்டியுள்ளார்.

இந்த விபத்தில் 7 பேர் உயிரிழந்ததுடன், 21 பேர் படுகாயமடைந்தனர் மற்றும் 24 பேர் சிறு காயங்களுக்குள்ளாகினர்.

பொதுப்போக்குவத்து ஓட்டுநர்களின் பொறுப்பற்ற மற்றும் கவனக்குறைவான வாகன ஓட்டமானது, குறிப்பாக மாகாணங்களுக்கு இடையேயான பஸ் சேவைகளில் அடிக்கடி நிகழும் ஒரு நிகழ்வாகும் என்று நீதிபதி டாக்டர் பிரேச்சந்திரா குறிப்பிட்டார். மேலும், தனியார் பேருந்துகளுக்கும் இலங்கை போக்குவரத்து சபை (இலங்கை பேரூந்து) பேருந்துகளுக்கும் இடையே அதிக வேகம், ஆபத்தான முந்திச் செல்லுதல் மற்றும் பந்தயங்களில் ஈடுபடுதல் ஆகியவை பயணிகளுக்கும் பாதசாரிகளுக்கும் ஆபத்தை விளைவிக்கும் என்றும் அவர் அவதானித்தார்.

பயணிகள் மற்றும் பிற சாலைப் பயனர்கள் உட்பட பல நேரில் கண்ட சாட்சிகளின் சாட்சியங்கள் மூலம் வழக்கு நிரூபிக்கப்பட்டது. விபத்துக்கு முன்பு பேருந்து பயங்கரமான வேகத்தில் சென்றதாகவும், ஆபத்தான முறையில் அசைந்ததாகவும் சாட்சிகள் கூறியதாக நீதிமன்றம் அவதானித்தது.

விபத்திற்கான காரணமாக இயந்திரக் கோளாறு எதையும் தொழில்நுட்பச் சாட்சியங்களும் நிராகரித்தன. சம்பவ இடத்தில் வாகனங்களைப் பரிசோதித்த மோட்டார் வாகன ஆய்வாளர், வாகனத்தில் எந்தவொரு இயந்திரக் கோளாறும் இல்லை என்பதைக் கண்டறிந்ததுடன், அந்தச் சாலையானது நிலையான நிலைமைகளின் கீழ் இயல்பு மற்றும் நேரான பகுதி என்றும் வர்ணித்தார்.

முச்சக்கரவண்டி ஓட்டுநர் திடீரென யூ-டேர்ன் (U-turn) செய்ய முயற்சித்ததாலேயே விபத்து ஏற்பட்டது என்று பிரதிவாதி தரப்பில் வாதிடப்பட்டது. மேலும், தான் அதிக வேகத்தில் வாகனம் ஓட்டியதையும் அவர் ஒப்புக்கொண்டார்.

குற்றவியல் சட்டக் கோவையின் 298ஆவது பிரிவின் கீழ் கவனக்குறைவான அல்லது அவசரமான செயலால் மரணத்தை விளைவித்தமைக்காக 7 குற்றச்சாட்டுகளும், மனித உயிருக்கு ஆபத்தை விளைவிக்கும் செயலின் மூலம் படுகாயங்களை ஏற்படுத்தியதற்காக 329ஆவது பிரிவின் கீழ் 21 குற்றச்சாட்டுகளும், அதே போன்ற சூழ்நிலைகளில் காயத்தை ஏற்படுத்தியதற்காக 328ஆவது பிரிவின் கீழ் 24 குற்றச்சாட்டுகளும் பிரதிவாதி மீது சுமத்தப்பட்டன.

நீண்ட விசாரணைக்குப் பிறகு, 298ஆவது பிரிவின் கீழ் உள்ள 7 குற்றச்சாட்டுகளுக்கு தலா ஒரு வருட கடூழியச் சிறைத்தண்டனையும், 329ஆவது பிரிவின் கீழ் உள்ள குற்றச்சாட்டுகளுக்கு தலா மூன்று மாதங்களும், 328ஆவது பிரிவின் கீழ் உள்ள குற்றச்சாட்டுகளுக்கு தலா ஒரு மாதமும் உயர் நீதிமன்றம் தண்டனை விதித்தது. இந்தத் தண்டனைகள் ஒவ்வொன்றாக (Consecutively) அனுபவிக்கப்பட வேண்டும் என்று உத்தரவிடப்பட்டதன் மூலம், மொத்தம் 13 ஆண்டுகள் மற்றும் மூன்று மாதக் கடூழியச் சிறைத்தண்டனையும், ரூ. 55,800 மொத்த அபராதமும் விதிக்கப்பட்டது.