செ.தி.பெருமாள் அதிக எண்ணிக்கையிலான அஸ்வெசும பயனாளிகளைக் கொண்ட நோர்வூட் பிரதேச செயலகத்தின் அஸ்வெசும பயனாளிகளின் பண மோசடி 162 மில்லியன் ரூபாயாக அதிகரித்துள்ளதாக விசாரணைகளில் தெரியவந்துள்ளது. இந்தப் பண மோசடியில் அலுவலகத்தைச் சேர்ந்த மேலும் மூன்று அதிகாரிகள் ஈடுபட்டிருந்தது கண்டறியப…
செ.தி.பெருமாள்
அதிக எண்ணிக்கையிலான அஸ்வெசும பயனாளிகளைக் கொண்ட நோர்வூட் பிரதேச செயலகத்தின் அஸ்வெசும பயனாளிகளின் பண மோசடி 162 மில்லியன் ரூபாயாக அதிகரித்துள்ளதாக விசாரணைகளில் தெரியவந்துள்ளது.
இந்தப் பண மோசடியில் அலுவலகத்தைச் சேர்ந்த மேலும் மூன்று அதிகாரிகள் ஈடுபட்டிருந்தது கண்டறியப்பட்டதை அடுத்து, இவ்விவகாரம் குறித்து விரிவான விசாரணை கோரி, நோர்வூட் பிரதேச செயலாளர் சமீரா கம்லத்) ஹட்டன் காவல் பிரிவின் சிறப்புப் புலனாய்வுப் பிரிவில் வியாழக்கிழமை (06) முறைப்பாடு அளித்துள்ளதாகக் காவல்துறை தெரிவித்துள்ளது.
முன்னதாக, பிரதேச செயலாளர் அளித்த முறைப்பாட்டின் பேரில், நோர்வூட் பிரதேச செயலகத்தின் பொறுப்பில் இருந்த இரண்டு பெண் அதிகாரிகள் ஹட்டன் காவல்துறையினரால் கைது செய்யப்பட்டு ஹட்டன் மாவட்ட நீதிமன்றத்தில் ஆஜர்படுத்தப்பட்டனர். அதனைத் தொடர்ந்து, அந்த இரண்டு சந்தேக நபர்களையும் இந்த மாதம் 11 ஆம் திகதி வரை நீதிமன்றக் காவலில் வைக்க உத்தரவிடப்பட்டது.
பயனாளிகள் தங்களுக்கு இழப்பீட்டுத் தொகை கிடைக்கவில்லை என்று நுவரெலியா மாவட்டச் செயலாளர் துஷாரி தென்னக்கோனுக்கு அனுப்பிய அநாமதேயக் கடிதத்தின் அடிப்படையில் இந்த மோசடி அம்பலமானது. அதன்படி, மாவட்டச் செயலாளர், சந்தேகத்திற்குரிய இருவரையும் மாவட்டத்தின் பிற பிரதேச செயலகங்களுக்கு இடமாற்றம் செய்ததுடன், 2023 முதல் 2025 ஆம் ஆண்டுக்குள் ஒரு சிறப்புத் தணிக்கை விசாரணையை நடத்துவதற்காக நுவரெலியா மாவட்டம் மற்றும் நிதி அமைச்சின் தணிக்கைப் பிரிவுகளைச் சேர்ந்த 10 அதிகாரிகள் கொண்ட குழுவையும் நியமித்தார்.
தணிக்கை அதிகாரிகள் பிரதேச செயலகத்தில் தங்கி, அது தொடர்பான விசாரணைகளைத் தொடர்ந்து நடத்தி வருவதுடன், அந்த அலுவலகத்தின் கீழ் பணியாற்றும் அனைத்து கிராம சேவை அதிகாரிகள், இழப்பீட்டுப் பிரிவின் பிற அதிகாரிகள் மற்றும் பல பயனாளிகளின் வாக்குமூலங்களும் பதிவு செய்யப்பட்டுள்ளன.
விசாரணையில், இழப்பீட்டுத் தொகை கிடைக்காதது குறித்து விசாரிக்கப் பயனாளிகள் அலுவலகத்திற்குச் சென்றபோது, “எனக்கு பணம் கிடைத்தால், அதை உங்கள் கணக்கில் வரவு வைத்துவிடுவேன்; மீண்டும் அலுவலகத்திற்கு வராதீர்கள்” என்று சந்தேக நபர்கள் பயனாளிகளை மிரட்டியதும் தெரியவந்துள்ளது.
மேலும், சந்தேக நபர்கள் இழப்பீட்டுத் தொகையைத் தங்கள் உறவினர்கள் மற்றும் நண்பர்களின் கணக்குகளில் வரவு வைத்ததாகவும், தனிப்பட்ட பணப் பரிமாற்றம் மூலம் கடனாக வழங்கியதாகவும், அவ்வாறு பணம் பெற்றவர்களிடமிருந்து வட்டியின்றி மாதாந்திரத் தொகையைத் தவணைகளில் வசூலித்ததாகவும் காவல்துறையினர் தெரிவித்துள்ளனர்.
இதற்கிடையில், நுவரெலியா மாவட்டத்தில் உள்ள 10 பிரதேச செயலகங்களில், இழப்பீட்டுத் தொகை, திவிநெகும மானியங்கள், சமுர்த்தி கொடுப்பனவுகள் மற்றும் கொவிட்-19 பெருந்தொற்றின் போது அரசாங்கத்தால் வழங்கப்பட்ட ரூ. 5,000 மற்றும் பிற சலுகைகள் முறையாக வழங்கப்பட்டுள்ளதா என்பதை விசாரிக்கச் சிறப்புத் தணிக்கைக் குழுவை நியமிக்கும் நடவடிக்கைகள் எடுக்கப்பட்டு வருவதாக நுவரெலியா மாவட்ட ஒருங்கிணைப்புக் குழுவின் தலைவரும் பாராளுமன்ற உறுப்பினருமான மஞ்சுளா சுரவீராராச்சி தெரிவித்தார்.
